×
login
ബൈപ്പാസ് യാഥാര്‍ത്ഥ്യമായിട്ട് ഒരാണ്ട്; ചോരയുണങ്ങാതെ പാത

കഴിഞ്ഞ വര്‍ഷം ജനുവരി 28ന് ബൈപാസ് ഉദ്ഘാടനം ചെയ്ത ദിവസം കാറുകള്‍ കൂട്ടിയിടിച്ച് സ്ത്രീകളും കുട്ടികളും ഉള്‍പ്പെടെ ആറു പേര്‍ക്കാണ് പരിക്കേറ്റത്. പിറ്റേന്ന് പുലര്‍ച്ചെ നാലിന് തടി കയറ്റിവന്ന ലോറി കൊമ്മാടിയിലെ ടോള്‍ പ്ലാസയില്‍ ഇടിച്ചു കയറി ബൂത്ത് തകര്‍ന്നു.

ജോ എബ്രഹാം

ആലപ്പുഴ: പതിറ്റാണ്ടുകളുടെ കാത്തിരിപ്പിന് ശേഷം ആലപ്പുഴ ബൈപ്പാസ് യാഥാര്‍ത്ഥ്യമായിട്ട് ഒരു വര്‍ഷം തികയാന്‍ ഇനി ഒരാഴ്ച മാത്രം. 2021 ജനുവരി 28നായിരുന്നു ബൈപ്പാസ് ഉദ്ഘാടനം. എന്നാല്‍ ബൈപ്പാസില്‍ ചോരയുണങ്ങുന്നില്ല. ഒരു വര്‍ഷത്തിനിടെ ഒരു ഡസിനിലേറെ അപകടങ്ങളാണ് സംഭവിച്ചത്. എട്ടു പേര്‍ മരിച്ചു.മുപ്പതിലേറെ പേര്‍ക്ക് ഗുരുതരമായി പരിക്കേറ്റു.  

ഈ പരമ്പരയിലെ അവസാനത്തെ അപകടമാണ് ചൊവ്വാഴ്ച രാത്രി 11നുണ്ടായത്. ആലപ്പുഴ സ്വദേശിയായ യുവാവ് മരിച്ചു. പഴവീട് മാപ്പിളശേരിയില്‍ ജോ എബ്രഹാം(25)ആണ് മരിച്ചത്. പട്ടണക്കാട് പബ്‌ളിക് സ്‌കൂള്‍ അദ്ധ്യപകനായ സജീവ് ജോസഫിന്റെയും, മിനിയുടെയും മകനായ ജോ ലോജിസ്റ്റിക് കമ്പനി ജീവനക്കാരനായിരുന്നു. ജോലി സ്ഥലത്ത് നിന്ന് വീട്ടിലേക്ക് കാറില്‍ മടങ്ങുമ്പോള്‍ എതിരെ വന്ന കവചിത മിനിലോറിയുമായി കൂട്ടിയിടിച്ചായിരുന്നു അപകടം. സഹോദരി: മിനി.  


കഴിഞ്ഞ വര്‍ഷം ജനുവരി 28ന് ബൈപാസ് ഉദ്ഘാടനം ചെയ്ത ദിവസം കാറുകള്‍ കൂട്ടിയിടിച്ച് സ്ത്രീകളും കുട്ടികളും ഉള്‍പ്പെടെ ആറു പേര്‍ക്കാണ് പരിക്കേറ്റത്. പിറ്റേന്ന് പുലര്‍ച്ചെ നാലിന് തടി കയറ്റിവന്ന ലോറി കൊമ്മാടിയിലെ ടോള്‍ പ്ലാസയില്‍ ഇടിച്ചു കയറി ബൂത്ത് തകര്‍ന്നു. ഫെബ്രുവരി, മാര്‍ച്ച് മാസങ്ങളില്‍ ചെറുതും വലുതുമായ 5 അപകടങ്ങളില്‍ 12 പേര്‍ക്ക് പരിക്കേറ്റു. മാര്‍ച്ച് 29ന് രാത്രി കളര്‍കോട് ബൈപാസില്‍ ബൈക്കില്‍ അജ്ഞാത വാഹനം ഇടിച്ച് സെക്രട്ടേറിയറ്റിലെ അണ്ടര്‍ സെക്രട്ടറി നീര്‍ക്കുന്നം സ്വദേശി ജി.സുധീഷ് (48) മരിച്ചു. ഏപ്രില്‍ ഒന്നിന് മാളികമുക്ക് മേല്‍പാലത്തില്‍ കാറും മിനിലോറിയും കൂട്ടിയിടിച്ച് കാര്‍ ഓടിച്ച കളപ്പുര സ്വദേശി ആഷ്ലിന്‍ ആന്റണി (26) മരിച്ചു. സുഹൃത്ത് ജിഷ്ണുവിനു (26) പരിക്കേറ്റു.

ആഗസ്ത് 10ന് ഇരവുകാട് ഭാഗത്ത് ബൈപാസിലേക്ക് കയറുന്ന ഭാഗത്ത് കാര്‍ കോണ്‍ക്രീറ്റ് കുറ്റികളില്‍ ഇടിച്ചു മറിഞ്ഞു ഡീസല്‍ ഒഴുകിയതിനുമേല്‍ ബൈക്കും മറിഞ്ഞു. 5 പേര്‍ക്ക് പരിക്കേറ്റു. അതേ മാസം 31ന് രാവിലെ കാഞ്ഞിരംചിറ ലെവല്‍ക്രോസിന് മുകളില്‍ കാറുകള്‍ കൂട്ടിയിടിച്ച് മരട് സ്വദേശി സുനില്‍കുമാറും (40), ചെല്ലാനം സ്വദേശി ബാബുവും (40) മരിച്ചു. മറ്റൊരാളും മരിച്ചു. നവംബര്‍ 15ന് വൈകിട്ട് നാലിന് ബൈപാസില്‍ കൊമ്മാടി സിഗ്‌നലിനു സമീപം മിനി ലോറി ഇടിച്ച് മംഗലം പനയ്ക്കല്‍ മേഴ്‌സി നെല്‍സണ്‍ (50) മരിച്ചു. ഡിസംബര്‍ 2ന് പുലര്‍ച്ചെ 4ന് കാഞ്ഞിരംചിറ ലവല്‍ ക്രോസിനു മുകളില്‍ ലോറികള്‍ തമ്മില്‍ കൂട്ടിയിടിച്ച് അഞ്ചപ പേര്‍ക്ക് പരിക്കേറ്റു. ഡിസംബര്‍ 9നു രാത്രി 12.30നു മേല്‍പാലത്തില്‍ കുതിരപ്പന്തിക്കു സമീപം 2 ബൈക്കുകള്‍ കൂട്ടിയിടിച്ച് മണ്ണഞ്ചേരി കുപ്പേഴത്ത് പുത്തന്‍പുരയില്‍ വാടകയ്ക്ക് താമസിക്കുന്ന പള്ളിപ്പറമ്പ് വീട്ടില്‍ ഷിഫ്‌നാസ് (22) മരിച്ചു. ഒപ്പം ഉണ്ടായിരുന്ന സഹോദരന്‍ ഉള്‍പ്പെടെ മൂന്നു പേര്‍ക്ക് പരുക്കേറ്റു.  

ബൈപാസില്‍ അപകടങ്ങള്‍ വര്‍ധിക്കുന്ന സാഹചര്യത്തില്‍ ആര്‍ടിഒയുടെ നിര്‍ദേശപ്രകാരം, വിവിധ വകുപ്പുകളുടെയും ബൈപാസ് നിര്‍മാണക്കമ്പനിയുടെയും സഹകരണത്തോടെ ടൗണ്‍ എന്‍ഫോഴ്‌സ്‌മെന്റ് നടത്തിയ പഠനത്തിലെ റിപ്പോര്‍ട്ടിലുള്ള നിര്‍ദേശങ്ങള്‍ ഫയലില്‍ ഉറങ്ങുകയാണ്. അമിത വേഗതയാണ് അപകടങ്ങള്‍ക്ക് പ്രധാന കാരണം. രക്ഷാപ്രവര്‍ത്തനം വൈകുന്നതും പ്രതിസന്ധിയാണ്.  

    comment

    LATEST NEWS


    സംസ്ഥാനത്ത് മഴയുടെ ശക്തി കുറഞ്ഞു; അഞ്ചു ജില്ലകളിലെ റെഡ് അലര്‍ട്ട് പിന്‍വലിച്ചു, മഴ മുന്നറിയിപ്പുകൾ തുടരും


    കോഴിക്കോട് നിര്‍മാണത്തിലിരുന്ന പാലം തകര്‍ന്നു; മൂന്ന് ബീമുകള്‍ ഇളകി പുഴയില്‍ വീണു, രണ്ട് തൊഴിലാളികൾക്ക് പരിക്ക്


    മണ്ണാർക്കാട് ഇരട്ടക്കൊല: 25പ്രതികള്‍ക്കും ജീവപര്യന്തം തടവുശിക്ഷ, 50,000 രൂപ വീതം പിഴയും അടയ്ക്കണം


    ജനകീയ പ്രതിക്ഷേധങ്ങള്‍ക്ക് വിജയം; കെ റെയില്‍ കല്ലിടല്‍ നിര്‍ത്തി; സര്‍വേ ജിപിഎസ് സൗകര്യം ഉപയോഗിച്ച് നടത്തുമെന്ന് സര്‍ക്കാര്‍


    സമയബന്ധിതമായ തെരഞ്ഞെടുപ്പ് പരിഷ്‌ക്കരണങ്ങളും ജനാധിപത്യ മാതൃക ചര്‍ച്ചകളും നടത്തും; 2024ലെ പൊതു തെരഞ്ഞെടുപ്പ് ഒരുക്കങ്ങള്‍ ആരംഭിച്ചു: രാജീവ് കുമാര്‍


    ശക്തമായ മഴ; നിലവില്‍ ഡാമുകള്‍ തുറക്കേണ്ട സാഹചര്യമില്ല; ജനങ്ങള്‍ക്ക് ജാഗ്രത നിര്‍ദേശം; മലയോര മേഖലകളില്‍ ദുരിതാശ്വാസ ക്യാമ്പ് ആരംഭിച്ചു

    പ്രതികരിക്കാൻ ഇവിടെ എഴുതുക:

    ദയവായി മലയാളത്തിലോ, ഹിന്ദിയിലോ, ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളിൽ അശ്ലീലവും അസഭ്യവും നിയമവിരുദ്ധവും അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ ഒഴിവാക്കുക. വ്യക്തിപരമായ അധിക്ഷേപങ്ങൾ പാടില്ല. വായനക്കാരുടെ അഭിപ്രായങ്ങൾ ജന്മഭൂമിയുടേതല്ല.