Janmabhumi| രണ്ട് ദിവസമായി അതിശക്തമായ മഴ: ആന്ധ്രയിലെ ഏറ്റവും വലിയ ജലസംഭരണിയില്‍ വിള്ളല്‍ കണ്ടത്തി: 20 ഗ്രാമങ്ങള്‍ ഒഴിപ്പിച്ചു

തിരുപ്പതി: ആന്ധ്രപ്രദേശിലെ റായലചെരുവ് ജല സംഭരണിയില്‍ നാല് ഇടങ്ങളില്‍ വിള്ളല്‍ കണ്ടെത്തി. വിള്ളലും ചോര്‍ച്ചയും സ്ഥിരീകരിച്ചതോടെ സമീപത്തെ 20 ഗ്രാമങ്ങള്‍ അടിയന്തരമായി ഒഴിപ്പിച്ചു. 500 വര്‍ഷത്തിലേറെ പഴക്കമുള്ളതാണ് ഈ ജലസംഭരണി. തിരുപ്പതിയില്‍ നിന്ന് ഏകദേശം 15 കിലോമീറ്റര്‍ ദൂരത്തിലാണ് ബണ്ട് സ്ഥിതി ചെയ്യുന്നത്. തിരുപ്പതി ജില്ലയില്‍ കഴിഞ്ഞ നാല് ദിവസമായി കനത്ത മഴയാണ്. വെള്ളപ്പാച്ചിലില്‍ റോഡുകള്‍ തകര്‍ന്നതിനാല്‍ പല ഗ്രാമങ്ങളും ഒറ്റപ്പെട്ടിരിക്കുകയാണ്. ആന്ധ്രയിലെ വെള്ളപ്പൊക്കത്തില്‍ ഇതുവരെ 40 പേരാണ് മരിച്ചത്.

നിലവില്‍ ജലസംഭരണിയില്‍ 0.9 ടിഎംസി വെള്ളമുണ്ട്. 0.6 ടിഎംസിയാണ് ആകെ സംഭരണശേഷി. ശക്തമായ നീരൊഴുക്കുമുണ്ട്. ഇതാദ്യമായാണ് ഇത്രയധികം വെള്ളം ജലസംഭരണിയിലേക്ക് ഒഴുകിയെത്തുന്നത്. അതിനാല്‍ ജാഗ്രത പാലിക്കാന്‍ കലക്ടര്‍ നിര്‍ദ്ദേശിച്ചിട്ടുണ്ട്. ചോര്‍ച്ച തടയുന്നതിന് വിദഗ്ധരുടെ അഭിപ്രായം തേടിയിട്ടുണ്ട്.ജലസംഭരണി അപകടാവസ്ഥയിലെന്ന് ജില്ലാ കലക്ടര്‍ വ്യക്തമാക്കി. വ്യോമസേനയും ദുരന്തനിവാരണസേനയും ചേര്‍ന്നാണ് ആളുകളെ മാറ്റി പാര്‍പ്പിക്കുകയും ചെയ്തു. വിവിധ സ്ഥലങ്ങളിലായി അമ്പതോളം പേരെ കാണാതായി. വ്യോമസേനയും നാവികസേനയും രക്ഷാപ്രവര്‍ത്തനം നടത്തുന്നുണ്ട്. സംസ്ഥാനത്ത് 20,000ല്‍ അധികം പേരെ ക്യാമ്പുകളിലേക്ക് മാറ്റിയിരുന്നു.കടപ്പ ജില്ലയിലാണ് കൂടുതല്‍ നാശനഷ്ടമുണ്ടായത്. രക്ഷാപ്രവര്‍ത്തനം ഇപ്പോഴും തുടരുകയാണ്. മരണ സംഖ്യ കൂടാനും സാഹചര്യമുണ്ട്.

comment