ന്യൂദല്ഹി: കേന്ദ്രബജറ്റ് അവതരണത്തിനുശേഷം നടത്തിയ വാര്ത്താസമ്മേളനത്തില് ഏറെ ശ്രദ്ധിക്കപ്പെട്ട് വനിതാ മാധ്യമപ്രവര്ത്തകയ്ക്കുവേണ്ടി ധനമന്ത്രി നിര്മലാ സീതാരാമന് നടത്തിയ ഇടപെടല്. കേന്ദ്ര ധനകാര്യ സഹമന്ത്രി അനുരാഗ് താക്കൂറും മറ്റ് ഉദ്യോഗസ്ഥരും കൂടി പങ്കെടുത്ത വാര്ത്താസമ്മേളനത്തിലായിരുന്നു ഇത്. ഒരു മണിക്കൂറിലേറെ നീണ്ട വാര്ത്താസമ്മേളനത്തില് ബജറ്റിനെക്കുറിച്ച് മാധ്യമപ്രവര്ത്തകര് ചോദിച്ച നിരവധി ചോദ്യങ്ങള്ക്ക് നിര്മലാ സീതാരാമന് കൃത്യമായ മറുപടി നല്കി.
ഇതിനിടയിലാണ് ഇക്ണോമിക് ടൈംസില്നിന്നുള്ള ഗുല്വീന് എന്ന മാധ്യമപ്രവര്ത്തകയ്ക്കായി തനിക്കൊപ്പം വാര്ത്താ സമ്മേളനത്തില് പങ്കെടുത്ത ഉദ്യോഗസ്ഥനോട് സംസാരിച്ചത്. വാര്ത്താ സമ്മേളനത്തിന്റെ ആദ്യ പകുതിക്കുശേഷമാണ് വനിതാ റിപ്പോര്ട്ടര് ചോദ്യം ചോദിക്കാനായി എഴുന്നേറ്റത്. ധനമന്ത്രിയോട് രണ്ടു ചോദ്യങ്ങള് ചോദിക്കാനുണ്ടെന്ന് റിപ്പോര്ട്ടര് പറഞ്ഞു.
‘ഇല്ല, ഒരു ചോദ്യം… മറ്റുള്ളവര്ക്കൂടിയുണ്ട്’ എന്ന് പ്രസ് ഇന്ഫര്മേഷന് ബ്യൂറോ(പിഐബി) മേധാവി കെ എസ് ധത്വാലിയ ചൂണ്ടിക്കാട്ടി. ഇതിനിടെയാണ് മാധ്യമപ്രര്ത്തകയെ പിന്തുണച്ച് നിര്മലാ സീതാരാമന് ഇടപെട്ടത്. ‘എന്തുകൊണ്ടാണ് താങ്കള് അവരോട് മാത്രം അങ്ങനെ പറഞ്ഞത്, താങ്കള് ആളുകളെ തടഞ്ഞില്ല’- നിര്മലാ സീതാരാമന് ധത്വാലിയയോട് പറഞ്ഞു.
പിഐബിയുടെ യുട്യൂബ് ചാനലില് അപ്ലോഡ് ചെയ്തിട്ടുള്ള വാര്ത്താ സമ്മേളനത്തിന്റെ 49.45 മിനിറ്റില് ഇത് കാണാനാകും. നിര്മലാ സീതാരാമന്റെ പരാമര്ശങ്ങള് എല്ലാവരിലും ചിരിപടര്ത്തി.
പ്രതികരിക്കാൻ ഇവിടെ എഴുതുക: