×
login
ചുഴലിക്കാറ്റില്‍ ആന്ധ്ര‍ാ തീരത്ത് സ്വര്‍ണ്ണ നിറത്തിലുള്ള രഥം അടിഞ്ഞു; സന്ദർശകരുടെ വൻ തിരക്ക്, രഥത്തിന് ഒരു ആശ്രമത്തിന്റെ രൂപവുമായി സാമ്യം

അസാനി ചുഴലിക്കാറ്റിന്റെ ആഘാതത്തിലാണ് രഥം ആന്ധ്രാതീരത്തേയ്‌ക്ക് എത്തിയത്. ഉയര്‍ന്ന വേലിയേറ്റം കാരണം രഥം തീരത്തേയ്‌ക്ക് എത്തിയതായിരിക്കാമെന്ന് പ്രദേശവാസികള്‍ പറഞ്ഞു.

വിശാഖപട്ടണം: ചുഴലിക്കാറ്റില്‍ ആന്ധ്രാ തീരത്തടിഞ്ഞ് സ്വര്‍ണ്ണ നിറത്തിലുള്ള രഥം. ആന്ധ്രാപ്രദേശിലെ ശ്രീകാകുളം സുന്നപ്പള്ളി തീരത്താണ് രഥം അടിഞ്ഞത്. മ്യാന്മര്‍, മലേഷ്യ, തായ്‌ലാന്‍ഡ് എന്നിവിടങ്ങളില്‍ നിന്നുള്ളതാകാം തേരെന്നാണ് സൂചന. രഥം ഗ്രാമവാസികള്‍ കെട്ടി കരയ്‌ക്കെത്തിച്ചിട്ടുണ്ട്.

ചൊവ്വാഴ്ച വൈകുന്നേരമാണ് മത്സ്യത്തൊഴിലാളികള്‍ രഥം കണ്ടെത്തിയത്. തെക്കുകിഴക്കന്‍ ഏഷ്യന്‍ രാജ്യങ്ങളില്‍ നിന്നുള്ള ഒരു ആശ്രമത്തിന്റെ രൂപവുമായി തേരിന് സാമ്യമുണ്ട്. അസാനി ചുഴലിക്കാറ്റിന്റെ ആഘാതത്തിലാണ് രഥം ആന്ധ്രാതീരത്തേയ്‌ക്ക് എത്തിയത്. ഉയര്‍ന്ന വേലിയേറ്റം കാരണം രഥം തീരത്തേയ്‌ക്ക് എത്തിയതായിരിക്കാമെന്ന് പ്രദേശവാസികള്‍ പറഞ്ഞു. രഥം തീരത്തേയ്‌ക്ക് അടുപ്പിക്കുന്നതിന്റെ വീഡിയോ സോഷ്യല്‍ മീഡിയയില്‍ പ്രചരിച്ചിരുന്നു.

സമീപ ഗ്രാമങ്ങളില്‍ നിന്നും രഥം കാണാന്‍ നിരവധി പേര്‍ ഇവിടേയ്‌ക്ക് എത്തുകയാണ്. ഇത് ഏതെങ്കിലും വിദേശരാജ്യത്ത് നിന്ന് വന്നതല്ലെന്ന് ശാന്തബോമ്മാലി തഹസില്‍ദാര്‍ ജെ ചലമയ്യ പറഞ്ഞു. ഇന്ത്യന്‍ തീരത്ത് എവിടെയെങ്കിലും സിനിമയുടെ ചിത്രീകരണത്തിന് രഥം ഉപയോഗിച്ചിരുന്നതായി സംശയിക്കുന്നു. ആന്‍ഡമാന്‍ കടലിനോട് ചേര്‍ന്നുള്ള പ്രദേശത്ത് നിന്നും രഥം കടല്‍ കൊണ്ട് വന്നതായിരിക്കാമെന്നും അദ്ദേഹം പറഞ്ഞു.

    comment

    പ്രതികരിക്കാൻ ഇവിടെ എഴുതുക:

    ദയവായി മലയാളത്തിലോ, ഹിന്ദിയിലോ, ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളിൽ അശ്ലീലവും അസഭ്യവും നിയമവിരുദ്ധവും അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ ഒഴിവാക്കുക. വ്യക്തിപരമായ അധിക്ഷേപങ്ങൾ പാടില്ല. വായനക്കാരുടെ അഭിപ്രായങ്ങൾ ജന്മഭൂമിയുടേതല്ല.