×
login
സിപിഎം ഓഫീസിനുളളിലെ അങ്കണവാടി പാര്‍ട്ടി കോണ്‍ഗ്രസ് സംഘാടക സമിതി ഓഫീസായി, പഠിതാക്കളായ പിഞ്ചുകുഞ്ഞുങ്ങള്‍ ദുരിതത്തില്‍

കുടുസ്സു മുറിയില്‍ ദുരിതത്തില്‍ കഴിയുന്ന പിഞ്ചുകുഞ്ഞുങ്ങള്‍ക്ക് ചുമയടക്കമുളള അസുഖങ്ങള്‍ തുടര്‍ക്കഥയാവുന്നതായും പരാതിയുണ്ട്.

കണ്ണൂർ: വര്‍ഷങ്ങളായി സിപിഎം ഓഫീസിന്റെ ഭാഗമായി പ്രവര്‍ത്തിക്കുന്ന അങ്കണവാടിയിലെ പിഞ്ചുകുഞ്ഞുങ്ങള്‍ ദുരിതത്തില്‍. ചെമ്പിലോട് പഞ്ചായത്തിലെ തലവില്‍ ചെമ്പിലോട് ഹയര്‍ സെക്കണ്ടറി സ്‌കൂളിന് സമീപത്തെ സിപിഎം ഓഫീസായ കൃഷ്ണപ്പിള്ള സ്മാരകമന്ദിരത്തോട് ചേര്‍ന്നുളള അങ്കണവാടിയിലെ വിദ്യാര്‍ത്ഥികളും ജീവനക്കാരുമാണ് അസൗകര്യങ്ങളില്‍ വീര്‍പ്പുമുട്ടുന്നത്.  

പാര്‍ട്ടി ഓഫീസിനോട് ചേര്‍ന്ന് പ്രവര്‍ത്തിക്കുന്നുവെന്നതിനാല്‍ തന്നെ ഏറെ ബുദ്ധിമുട്ട അനുഭവിച്ചു വരികയായിരുന്നു കുട്ടികളും ജീവനക്കാരും. ഓഫീസ് പാര്‍ട്ടി കോണ്‍ഗ്രസ് സംഘാടക സമിതി ഓഫീസു കൂടിയാക്കിയതോടെ ഇവര്‍ കടുത്തദുരിതത്തിലാക്കിയിരിക്കുകയാണ്.  


കൃഷ്ണപ്പിള്ള സ്മാരകമന്ദിരത്തിലെ കുടുസ്സ് പോലുള്ള മുറിക്ക് പുറത്ത് കാറ്റും വെളിച്ചവും കടക്കാത്ത രൂപത്തില്‍ പാര്‍ട്ടി കോണ്‍ഗ്രസ് സംഘാടക സമിതി ഓഫീസ് എന്ന ഫ്ലക്‌സ് ബോര്‍ഡുകളും തോരണങ്ങളും തൂക്കിയിട്ടിരിക്കുകയാണ്. ഫ്ലക്‌സിന്റേയും മറ്റും രൂക്ഷഗന്ധം അങ്കണവാടി മുറിക്കുളളില്‍ പഠനത്തിനെത്തുന്ന 20 ല്‍ അധികം വരുന്ന പിഞ്ചുകുഞ്ഞുങ്ങള്‍ക്ക് തീരാദുരിതമായിരിക്കുകയാണ്. ഭയം കാരണം പാര്‍ട്ടി നടപടിയ്‌ക്കെതിരെ പ്രതികരിക്കാന്‍ രക്ഷിതാക്കള്‍ മടിക്കുകയാണ്.  

സിപിഎം ഭരിക്കുന്ന പഞ്ചായത്തില്‍ ഇതും ഇതിനപ്പുറവും നടക്കുമെന്നാണ് പ്രദേശവാസികളും പാര്‍ട്ടി അനുകൂലികളുമായ നാട്ടുകാരും പറയുന്നത്. കുടുസ്സു മുറിയില്‍ ദുരിതത്തില്‍ കഴിയുന്ന പിഞ്ചുകുഞ്ഞുങ്ങള്‍ക്ക് ചുമയടക്കമുളള അസുഖങ്ങള്‍ തുടര്‍ക്കഥയാവുന്നതായും പരാതിയുണ്ട്.

    comment

    പ്രതികരിക്കാൻ ഇവിടെ എഴുതുക:

    ദയവായി മലയാളത്തിലോ, ഹിന്ദിയിലോ, ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളിൽ അശ്ലീലവും അസഭ്യവും നിയമവിരുദ്ധവും അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ ഒഴിവാക്കുക. വ്യക്തിപരമായ അധിക്ഷേപങ്ങൾ പാടില്ല. വായനക്കാരുടെ അഭിപ്രായങ്ങൾ ജന്മഭൂമിയുടേതല്ല.