×
login
ബസിൽനിന്ന് വിദ്യാർഥി റോഡിലേക്ക് തെറിച്ചുവീണു; യാത്രക്കാർ ബഹളംവെച്ചിട്ടും നിർത്താതെ കെഎസ്ആർടിസി ബസ്

ബസ് ചീരങ്കാവിലേക്ക് വരുന്നതിനിടെ പെട്രോൾ പമ്പിന് സമീപത്തുള്ള വളവ് തിരിയുന്നതിനിടെ നിഖിൽ വാതിൽ തുറന്ന് പുറത്തേക്ക് വീഴുകയായിരുന്നു.

കൊല്ലം: ഓടുന്ന  കെഎസ്ആർടിസി ബസിൽനിന്ന് വിദ്യാർഥി റോഡിലേക്ക് തെറിച്ചുവീണ് പരിക്ക്. എഴുകോൺ ടെക്നിക്കൽ സ്കൂളിലെ ഒമ്പതാം ക്ലാസ് വിദ്യാർഥി നാന്തിരിക്കൽ ഷീബ ഭവനിൽ നിഖിലാണ് അപകടത്തിൽപ്പെട്ടത്. തലയ്ക്കും മുഖത്തും കാലിലും പരിക്കേറ്റ നിഖിലിനെ കൊല്ലത്തെ ആശുപത്രിയിൽ പ്രവേശിപ്പിച്ചു. ബസിൽനിന്ന് വിദ്യാർഥി തെറിച്ചുവീഴുന്നത് കണ്ട് യാത്രക്കാർ ബഹളംവെച്ചെങ്കിലും ബസ് നിർത്താതെ പോകുകയായിരുന്നു. വളവ് തിരിയുന്നതിനിടെയാണ് വാതിലിൽനിൽക്കുകയായിരുന്ന വിദ്യാർഥി തെറിച്ചുവീണത്.

എഴുകോൺ പെട്രോൾ പമ്പിന് സമീപത്തുവെച്ച് കഴിഞ്ഞ ദിവസം വൈകിട്ടാണ് അപകടം ഉണ്ടായത്. സ്കൂൾ വിട്ട് എഴുകോണിൽനിന്ന് കൊട്ടാരക്കര-കരുനാഗപ്പള്ളി കെഎസ്ആർടിസി ബസിലാണ് നിഖിലും സഹപാഠികളും കയറിയത്. ബസിനുള്ളിൽ തിരക്കായതിനാൽ നിഖിലും സഹപാഠികളും  വാതിൽപ്പടിയിൽനിന്നാണ് യാത്ര ചെയ്തത്. ബസ് ചീരങ്കാവിലേക്ക് വരുന്നതിനിടെ പെട്രോൾ പമ്പിന് സമീപത്തുള്ള വളവ് തിരിയുന്നതിനിടെ നിഖിൽ വാതിൽ തുറന്ന് പുറത്തേക്ക് വീഴുകയായിരുന്നു.  

അപകടം കണ്ട് നിഖിലിനൊപ്പമുണ്ടായിരുന്ന സഹപാഠികൾ ബഹളംവെച്ചെങ്കിലും ബസ് സംഭവസ്ഥലത്ത് നിർത്താതെ ചീരങ്കാവ് ജങ്ഷനിലാണ് നിർത്തിയത്. കുട്ടികളെ അവിടെ ഇറക്കിവിട്ടശേഷം ബസ് പോകുകയും ചെയ്തു. നിഖിലിനെ സംഭവസ്ഥലത്ത് ഉണ്ടായിരുന്ന ഹോംഗാർഡ് സുരേഷ് ബാബു ആശുപത്രിയിൽ എത്തിക്കുകയായിരുന്നു. സംഭവത്തിൽ കെഎസ്ആർടിസി ബസ് ജീവനക്കാർക്കെതിരെ പരാതിയുമായി നിഖിലിന്‍റെ വീട്ടുകാർ രംഗത്തെത്തി. എന്നാൽ ഇത്തരമൊരു സംഭവത്തെക്കുറിച്ച് അറിയില്ലെന്നാണ് ഡിപ്പോ ജീവനക്കാർ പറയുന്നത്.

    comment

    പ്രതികരിക്കാൻ ഇവിടെ എഴുതുക:

    ദയവായി മലയാളത്തിലോ, ഹിന്ദിയിലോ, ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളിൽ അശ്ലീലവും അസഭ്യവും നിയമവിരുദ്ധവും അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ ഒഴിവാക്കുക. വ്യക്തിപരമായ അധിക്ഷേപങ്ങൾ പാടില്ല. വായനക്കാരുടെ അഭിപ്രായങ്ങൾ ജന്മഭൂമിയുടേതല്ല.