കോട്ടയം: 2019 ജൂലൈ ഒന്നിന് മുന്പ് കേരള സര്വ്വീസില് നിന്നും വിരമിച്ചവര് പെന്ഷന് പരിഷ്കരിച്ച് കിട്ടുന്നതിന് അപ്പന്റിക്സ് 1 എന്ന അപേക്ഷയുടെ മൂന്ന് കോപ്പി പൂരിപ്പിച്ച് ട്രഷറിയില് എത്തിക്കണമെന്ന നിബന്ധന പിന്വലിക്കണമെന്ന് കേരള സ്റ്റേറ്റ് പെന്ഷനേഴ്സ് സംഘ് കോട്ടയം ജില്ലാ കമ്മിറ്റി സര്ക്കാരിനോട് അഭ്യര്ത്ഥിച്ചു.
അപേക്ഷയില് ആവശ്യപ്പെട്ടിരിക്കുന്ന എല്ലാ വിവരങ്ങളും ഇപ്പോള്ത്തന്നെ ട്രഷറി ഡേറ്റബേസില് ലഭ്യമാണ്. ശമ്പള കമ്മീഷന് നിര്ദ്ദേശിച്ച ലളിതമായ പ്രക്രിയയിലൂടെ എല്ലാ പെന്ഷന്കാരുടെയും പെന്ഷന് 2019 ജൂലൈ ഒന്ന് മുതല് പുതുക്കി നിര്ണ്ണയിക്കാന് സാധിക്കുമെന്നിരിക്കെ വയോധികരായ പെന്ഷന്കാര് അപേക്ഷ സമര്പ്പിച്ചെങ്കിലെ പരിഷ്കരണം നടത്തൂ എന്ന് ശഠിക്കരുത്.
സര്ക്കാര് സംവിധാനങ്ങള് കടലാസ് രഹിതമായി മാറിക്കൊണ്ടിരിക്കുന്ന ഇക്കാലത്ത് പാഴ്ചിലവുകളും സമയനഷ്ടവും ഒഴിവാക്കി വേഗത്തില് പരിഷ്കരണത്തിന്റെ ഗുണം പെന്ഷന്കാര്ക്ക് ലഭ്യമാക്കണമെന്നും ജില്ലാ കമ്മിറ്റി ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: