×
login
മറുവാദം

കവിത

അച്യുത് എ. രാജീവ്

 

ഒരു കരിയിലയില്‍

എരിഞ്ഞടങ്ങുമായിരുന്ന

അഗ്‌നിനാളമാണ്

കാറ്റിന്റെ തുടര്‍ച്ചയായ

പീഡകളില്‍ ഭ്രാന്തെടുത്ത്

കാടാകെ ചുട്ടെരിച്ച  

കാട്ടുതീ  

 

ഇരുണ്ട നിറത്തിന്‍ പേരില്‍

പരിഹസിക്കപ്പെട്ട

മേഘങ്ങളുടെ കണ്ണീര് കണ്ട്

ലോകത്തോടുള്ള

ആകാശത്തിന്റെ

പരുഷമായ വിരട്ടലാണ്  

ഇടിമിന്നല്‍  

 

കരയെ ഇനിമേല്‍

തൊട്ടുപോകരുതെന്ന്

ചൊല്ലി

മുന്നില്‍ നിരന്നുനിന്ന

കരിങ്കല്‍കൂട്ടങ്ങളെ

മറികടന്നുള്ള

കടലിന്റെ ആലിംഗനമാണ്


കടല്‍കയറ്റം

 

ഭൂമിയുടെ വസ്ത്രമായ

പച്ചക്കാടുകളെ

ബലമായുരിഞ്ഞ

ധാര്‍ഷ്ട്യത്തോടുള്ള

രോഷത്താല്‍ വിറയാര്‍ന്ന

പ്രതികരണമാണ്

ഭൂമികുലുക്കം

 

നാടെങ്ങും നടമാടുന്ന

ഹിംസകളില്‍

അരിശംപൂണ്ട്

കാറ്റ് കെട്ടിയാടിയ

സംഹാരരൂപിയായ

തെയ്യക്കോലമാണ്

ചുഴലിക്കാറ്റ്  

 

പുഴയ്ക്ക്

കൂടുതല്‍ പ്രിയമാരെയെന്ന

ഇരുകരകളുടെ

നിലയ്ക്കാത്ത തര്‍ക്കം കണ്ട്

രണ്ട് വശത്തേക്കും

പുഴ ഒഴുകി പരന്നതിന്റെ

പേരാണ് പ്രളയം.

    comment

    പ്രതികരിക്കാൻ ഇവിടെ എഴുതുക:

    ദയവായി മലയാളത്തിലോ, ഹിന്ദിയിലോ, ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളിൽ അശ്ലീലവും അസഭ്യവും നിയമവിരുദ്ധവും അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ ഒഴിവാക്കുക. വ്യക്തിപരമായ അധിക്ഷേപങ്ങൾ പാടില്ല. വായനക്കാരുടെ അഭിപ്രായങ്ങൾ ജന്മഭൂമിയുടേതല്ല.