×
login
ഡിജിറ്റല്‍ ക്യാമറ

കറുത്ത കാറ്റിന്റെ ചിറകിലേക്കൊരാള്‍ വെറുപ്പുകൂട്ടിവ- ച്ചെറിഞ്ഞു നോക്കുന്നു അകലെ നില്‍ക്കുന്ന മരക്കൊമ്പില്‍ ചാഞ്ഞ മകര സൂര്യനെ യര്‍ത്തി മാറ്റുവാന്‍.

അനീഷ് കെ.അയിലറ

 

കറുത്ത കാറ്റിന്റെ

ചിറകിലേക്കൊരാള്‍

വെറുപ്പുകൂട്ടിവ-

ച്ചെറിഞ്ഞു നോക്കുന്നു

അകലെ നില്‍ക്കുന്ന

മരക്കൊമ്പില്‍ ചാഞ്ഞ

മകര സൂര്യനെ  

യര്‍ത്തി മാറ്റുവാന്‍.

ഇരുട്ടു മൂടിയ-

ങ്ങിതുവഴി പോയ

വെളുത്ത പൂച്ചപോല്‍

പതുങ്ങും നോട്ടത്തില്‍

നരച്ച സൂര്യന്റെ

വയസ്സു കൂട്ടുന്ന

വഴിക്കണക്കില്‍ ഞാന്‍

പകച്ചു നില്‍ക്കുന്നു.

വിയര്‍ത്ത കാഴ്ചയില്‍

കിതയ്ക്കുമച്ഛന്റെ

പഴയ ക്യാമറ

പതിച്ച ചിത്രത്തില്‍

പകല്‍ കിനാവുക -

ളുടഞ്ഞ സെല്‍ഫിയില്‍

നിറം പകര്‍ത്തുന്നു

കടലിന്‍ സന്ധ്യകള്‍.

മനസ്സും വായുവും

മധുര സ്വപ്‌നവും

വിലയ്ക്ക് വാങ്ങുവാന്‍

വിധിച്ച നമ്മള്‍ക്കു

ഇതെന്റെ ചിത്രങ്ങ-

ളിതെന്റെയാകാശം

ഇതെന്റെ ഭൂമിയെ-

ന്നളന്നു വയ്ക്കുന്നു.

വലിയ ക്യാന്‍വാസു

ചുരുങ്ങി വന്നൊരു

ചെറിയ ചിപ്പില-

ങ്ങൊളിഞ്ഞിരിക്കുന്നു.

 

 

 

 

    comment

    പ്രതികരിക്കാൻ ഇവിടെ എഴുതുക:

    ദയവായി മലയാളത്തിലോ, ഹിന്ദിയിലോ, ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളിൽ അശ്ലീലവും അസഭ്യവും നിയമവിരുദ്ധവും അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ ഒഴിവാക്കുക. വ്യക്തിപരമായ അധിക്ഷേപങ്ങൾ പാടില്ല. വായനക്കാരുടെ അഭിപ്രായങ്ങൾ ജന്മഭൂമിയുടേതല്ല.