ആറന്മുള കണ്ണാടിയും വൃദ്ധരെ ക്ഷേത്ര നടകളില് ഉപേക്ഷിക്കുന്നതും മുഖ്യ പ്രമേയമാക്കിയ ക്രിയേറ്റീവ് മൂവീസിന്റെ ‘ഉല’ പ്രദര്ശനത്തിനൊരുങ്ങുന്നു. സ്വാമി ശ്രീനാരായണ ഗുരു, കൂടിയാട്ടം, മാന്മിഴിയാള് തുടങ്ങിയ ശ്രദ്ധേയമായ സിനിമകള് സംവിധാനം ചെയ്തിട്ടുള്ള ജി. കൃഷ്ണസ്വാമിയാണ് ഉല സംവിധാനം ചെയ്തിരിക്കുന്നത്.
കൃഷ്ണസ്വാമിയുടെ എട്ടാമത്തെ സംവിധാന സംരഭത്തില് പ്രധാന വേഷത്തിലെത്തുന്നത് കോമഡി സ്റ്റാര് ഫെയിം സന്തോഷ് മേവടയാണ്. കഥ, തിരക്കഥ, സംഭാഷണം- ഒരുക്കിയിരിക്കുന്നത് കൃഷ്ണസ്വാമിയുടേ മകനും അധ്യാപകനുമായ ഡോ. നെത്തല്ലൂര് ഹരികൃഷ്ണനാണ്.
പഞ്ചഭൂതങ്ങളെ അടിസ്ഥാനമാക്കി നിര്മ്മിക്കുന്ന സിനിമാ പരമ്പരകളില് ആദ്യത്തേതാണ് ഉല. ആറന്മുള കണ്ണാടിയുടെ നിര്മാണത്തിലൂടെ ചലിക്കുന്ന സിനിമയില് അഗ്നിയെ അടിസ്ഥാനമാക്കിയാണ് ഉലയെന്ന പേര് നല്കിയിരിക്കുന്നത്.
രണ്ട് മണിക്കൂര് നീണ്ട് നില്ക്കുന്ന സിനിമയില് ആറന്മുള കണ്ണാടിയും വയോധികരുടെ ജീവിതവുമാണ് പ്രതിബാധിക്കുന്നത്. ബുദ്ധി സ്ഥിരതയില്ലാത്ത യുവാവിന്റെയും സമീപവാസിയായ ഒരു വല്ല്യമ്മയുമാണ് മുഖ്യ കഥാപാത്രങ്ങള്. വല്ലമ്മയെ ബന്ധുക്കള് ക്ഷേത്രത്തില് കൊണ്ടുപോയി ഉപേക്ഷിക്കുന്നതും ഇതിനിടെ ഇവരുടെ ഭര്ത്താവ് മരിക്കുന്നതും, ഏറെ പരിശ്രമത്തിനൊടുവില് യുവാവ് കണ്ണാടി നിര്മിക്കുന്നതുമൊക്കെ സിനിമയില് തന്മയത്വത്തോടെ അവതരിപ്പിച്ചിട്ടുണ്ട്.
ഇതിനോടകം തന്നെ സിനിമ ബിയോഫ് ഇന്റര് നാഷണല് ഫിലിം ഫെസ്റ്റിവെല്, പെന്ഗില്ഡ് ഫിലിം ഫെസ്റ്റിവെല്, സയാഗുഅര്ബന് ഫിലിമിക് ഫെസ്റ്റ് എന്നീ ഇന്റര്നാഷണല് മേളകളിലേക്ക് തെരഞ്ഞെടുക്കപ്പെട്ടിരുന്നു. 2019ല് നിര്മാണം പൂര്ത്തിയായ സിനിമയുടെ മറ്റ് ജോലികള് നടക്കുന്നതിനിടെയാണ് കോവിഡ് വില്ലനായി എത്തിയത്. ഇതാണ് റിലീസിങ്ങ് നീണ്ട് പോകാന് കാരണമായത്.
ക്രിയേറ്റീവ് മൂവീസ് ആണ് സിനിമ നിര്മിച്ചിരിക്കുന്നത്. ജലം, വായു, അഗ്നി, വായു, ഭൂമി, ആകാശം എന്നീ പഞ്ചഭൂതങ്ങളെ അടിസ്ഥാനമാക്കി അഞ്ച് സിനികള് നിര്മിക്കുകയാണ് ഇവരുടെ ലക്ഷ്യം. ഇതിലെ ആദ്യ സിനിമ കൂടിയാണ് ഉള്ളില് കത്തുക എന്ന അര്ത്ഥം വരുന്ന ഉല. അജയ്കുട്ടി ന്യൂദല്ഹി, ജോര്ജ് മണിമല, ബാബു കോട്ടാങ്ങല്, പി.എസ്. രത്നാകര ഷേണായി, മോഹന് ഡി. കുറിച്ചി, നയനന് നന്ദിയോട്, ജിജി വാഴൂര്, പള്ളം പി.ജെ., ലാലി തിരുവല്ല, ഷൈനി സിജോ, സൗമ്യ തൃഷ്ണ തുടങ്ങിയവര് സിനിമയില് വേഷമിട്ടിട്ടുണ്ട്. കാമറ- ലിജോ, സുനില്, പശ്ചാത്തല സംഗീതം – മുരളി സിത്താര, പ്രൊഡക്ഷന് കണ്ട്രോളര്- വിജയന് പാല, പിആര്ഒ- ശിവ വെങ്കിടേഷ് കെ, എഡിറ്റിങ്- ലാലു എന്നിവരും നിര്വഹിച്ചിരിക്കുന്നു.
ഓണ്ലൈന് പ്ലാറ്റ് ഫോം വഴി മെയ് അവസാന വാരത്തോടെ സിനിമ റിലീസ് ചെയ്യാനാണ് അണിയറ പ്രവര്ത്തകരുടെ നീക്കം. ഡോ. നെത്തല്ലൂര് ഹരികൃഷ്ണന് കഥയെഴുതുന്ന ചട്ടമ്പിസ്വാമികളെ കുറിച്ചുള്ള സിനിമയാണ് ജി. കൃഷ്ണസ്വാമിയുടെ അടുത്ത പ്രൊജക്ട്. റിലീസിന് പിന്നാലെ ജലത്തെ ആസ്പദമാക്കി അടുത്ത സിനിമ നിര്മ്മിക്കാനാണ് ക്രിയേറ്റീവ് മൂവീസിന്റെ ശ്രമം.
പ്രതികരിക്കാൻ ഇവിടെ എഴുതുക: