ബ്രഹ്മചാരി സുധീര് ചൈതന്യ
കാലനേമി എന്ന മടിയെ (മടിയെന്നാല് ഒരു കാര്യം മാറ്റിവയ്ക്കുന്നത്) വധിച്ച് സഞ്ജീവനി നല്കുന്ന ഗുരുവാണ് ഹനുമാന്. മൃതസഞ്ജീവനിയാല് ലക്ഷ്മണനെ സുഖപ്പെടുത്തുന്നതു പോലെ വൈരാഗ്യം ഭക്തിയില് മാത്രമേ ശക്തിപ്പെടുകയുള്ളൂ.
ശ്രീ രഘു ബീര ഹരഷി ഉരലായേ
(അര്ഥം: ശ്രീരാമന്റെ ജീവന് തന്നെയാണ് ലക്ഷ്മണന്. ആ ജീവനാണ് ഹനുമാന് തിരിച്ചു നല്കുന്നത്. അതിന് എന്തു പകരം നല്കി കടം വീട്ടും എന്ന ഒരു ചോദ്യം വരും. എന്തു തന്നെ പകരം നല്കിയാലും ആ കടം വീട്ടാന് പറ്റില്ല. അങ്ങനെ തിരിച്ചെന്തു നല്കും എന്നറിയാതെ, സന്തോഷാധിക്യത്താല് ഭഗവാന് ശ്രീരാമന് ഹനുമാനെ ആലിംഗനം ചെയ്തു.
ഭഗവാനെ നമ്മളും ബുദ്ധിമുട്ടിക്കുന്നത് അങ്ങനെയാവണം. നമ്മുടെ സേവയില് മനം നിറഞ്ഞ് നമുക്ക് എന്തു തരും എന്നറിയാത്ത അവസ്ഥ സമ്മാനിച്ചാവണം. ഹനുമാന് ഇത്തരത്തില് ചെയ്യുന്നതെല്ലാം നമുക്കൊരു മാതൃകയാണ്.
രഘുപതി കീന്ഹി ബഹുത് ബഡായി
തുമ് മമ പ്രിയ ഭരതഹി സമഭായീ
(അര്ഥം: ശ്രീരാമന് അങ്ങയെ മുക്തകണ്ഠം പ്രശംസിച്ചു. ‘ഭവാന് എനിക്ക് ഭരതനെപ്പോലെ പ്രിയനല്ലോ.’ എന്ന് ശ്രീരാമന് അരുളിച്ചെയ്തു). ലക്ഷ്മണനെ രക്ഷിച്ച ഹനുമാനെ ആലിംഗനം ചെയ്താണ് ഭഗവാന് ഇങ്ങനെ പറഞ്ഞത്.
പലപ്പോഴും ആളുകള് ചോദിക്കാറുണ്ട് ‘എന്തേ ഹനുമാനെ ലക്ഷ്മണനുമായി ഭഗവാന് താരതമ്യം ചെയ്തില്ല?’
നമുക്ക് ഭരതന്റെയും ലക്ഷ്മണന്റെയും പ്രത്യേകതകള് നോക്കാം:
ലക്ഷ്മണന് ഭഗവാനോടൊപ്പം സഹവസിക്കാനുള്ള മഹാഭാഗ്യം ലഭിച്ചു. എന്നാല് ഭഗവാനൊപ്പം പോകാതെ അയോധ്യാ രാജ്യം ‘ഭഗവാന്റെ ഉപകരണമായി’ ഭരിച്ച ഭരതന്റെ കര്മം എപ്പോഴും ഒരു പടി മുകളിലാണ്. ഇനി മറ്റൊരു രീതിയിലും ഈ വരികളെ വ്യാഖ്യാനിക്കാം.
അഭിനന്ദനം അല്ലെങ്കില് അംഗീകാരം എന്നത് ബന്ധങ്ങള് നിലനിര്ത്താന് അനിവാര്യമാണ്. അത് കൊടുക്കേണ്ട സമയത്ത് നമ്മള് കൃത്യമായി കൊടുക്കണം.
നമ്മള് നല്കുന്ന നല്ല രണ്ട് വാക്കുകള്ക്ക് ബന്ധങ്ങളെ കൂടുതല് ദൃഢമാക്കാനാവും. പ്രകടിപ്പിക്കാത്ത സ്നേഹമെന്നത് സ്നേഹമല്ല. നമ്മളില് പലര്ക്കും അറിയാത്തൊരു സത്യമാണത്.
നാം വാക്കുകള്ക്ക് പിശുക്കു കാട്ടാതെ ആവശ്യമായ നേരത്ത് അത് നല്കണം. ഇവിടെ ഏറ്റവും മികച്ച രീതിയിലാണ് ഭഗവാന്, ഹനുമാനെ അംഗീകരിക്കുന്നത്. ഭരതനോട്, തനിക്കേറ്റവും പ്രിയപ്പെട്ടവനോടാണ് ഹനുമാനെ താരതമ്യം ചെയ്യുന്നത്. ഇക്കാര്യങ്ങള് നമ്മളും ശ്രദ്ധിക്കേണ്ടതുണ്ട്. സ്നേഹം ഒതുക്കി നിര്ത്തിയില്ലെങ്കില് ആര്ക്കാണോ അത് നല്കുന്നത് അയാള് വഷളാവും എന്നത് നമ്മില് പലര്ക്കുമുള്ള തെറ്റായ ചിന്താഗതിയാണ്. എന്നാല് നമ്മള് നിസ്വാര്ഥ സ്നേഹമാണ് നല്കുന്നതെങ്കില് അത് ആരെയും വഷളാക്കില്ല. അതേസമയം നമ്മുടെ സ്നേഹം ആളുകള് ചൂഷണം ചെയ്യുന്നുണ്ടോ എന്ന കാര്യത്തില് നമ്മള് ജാഗരൂകരാകുകയും വേണം.
പ്രതികരിക്കാൻ ഇവിടെ എഴുതുക: