പടിഞ്ഞാറ്
‘സൂര്യന് അസ്തമിക്കുന്നു ‘എന്നര്ത്ഥം വരുന്ന പടിഞ്ഞാറു ദിക്ക് വരുണദേവന് ആധിപത്യം ഉള്ളതിനാല് വരുണദിക്ക് എന്നുമറിയപ്പെടുന്നു. പടിഞ്ഞാറു ദിക്കിലേക്കുള്ള ഗൃഹനിര്മ്മാണത്തിനായി ചില പ്രത്യേക നിബന്ധനകള് ശാസ്ത്രം നിര്ദേശിച്ചിട്ടുണ്ട്. അതില് ഒന്നാണ് വാസ്തുഗണിത പ്രകാരമുള്ള ഏകയോനി അളവുകള്. മറ്റു ദിക്കുകളിലേക്ക് സ്വീകരിക്കപ്പെടുന്ന സിംഹം, വൃഷഭം, ഗജം എന്നീ എല്ലാ അളവുകളും പടിഞ്ഞാറ് നില്ക്കുന്ന
നിര്മിതികള്ക്ക് അനുയോജ്യമല്ല. മറിച്ചു ധ്വജയോനി അളവുകള് മാത്രമേ നിര്മാണത്തിന് സ്വീകരിക്കാവൂ. പടിഞ്ഞാറ് ദിക്കിലുള്ള നിര്മ്മിതികളുടെ ഉപനിര്മ്മിതികളും ധ്വജയോനി ചുറ്റളവില് തന്നെ വരണം എന്നും നിര്ബന്ധമാണ്.
ദ്വിശാല സമ്പ്രദായത്തില് തെക്കിനിയോടൊപ്പം ചേര്ക്കേണ്ടതും പടിഞ്ഞാറ്റിനി എന്ന സങ്കല്പത്തിലുള്ള ഈ ഭാഗമാണ്.
പുരയിടത്തിലും നിര്മാണത്തിലും പടിഞ്ഞാറു ഉയര്ന്നിരിക്കുന്നതും നല്ലതാണ്. നിര്മിതിയുടെ പടിഞ്ഞാറ് ദിക്കിന്റെ അലോസരം സമ്പത്തിനെ നശിപ്പിക്കുന്നു എന്ന് പ്രമാണമുണ്ട്. ക്ഷേത്ര നിര്മാണത്തില് ഉഗ്രമൂര്ത്തി സങ്കല്പ്പത്തിലുള്ള ദേവതകള്ക്ക് ചേര്ന്നതും ഈ ദിക്കാണ്.
വടക്ക് പടിഞ്ഞാറ്
വടക്കുപടിഞ്ഞാറ് മൂലയ്ക്ക് വായുകോണ് എന്നാണ് വാസ്തുനാമം. ഇവിടെ ദേവത വായുദേവന് ആയതിനാലാണിത്. ഈ ഭാഗം സ്ത്രീകളുമായി ബന്ധപ്പെടുത്തി സൂചിപ്പിച്ചിരിക്കുന്നു എന്നതിനാല് ഈ ദിക്കിന്റെ അഭാവം സ്ത്രീകളെയാണ് അധികം ബാധിക്കുന്നത്. അടുക്കള, കിടപ്പുമുറി എന്നിവയടക്കം എല്ലാ നിര്മിതികള്ക്കും യോജിച്ച ഈ ഭാഗത്തു കിണര് വരുന്നത് ഉചിതമല്ല എന്ന് ശാസ്ത്രം പറയുന്നു. ‘നാരീക്ഷയം മാരുതേ’ എന്നാണ് ഗ്രന്ഥസൂചന. വായുകോണിന്റെ അഭാവം വാസ്തുപുരുഷന്റെ കൈയുടെ കുറവിനെ സൂചിപ്പിക്കുന്നു. അത് അര്ത്ഥനാശവും സ്ത്രീദോഷവും ഉണ്ടാക്കുന്നുവെന്നും പ്രമാണവചനമുണ്ട്.
വടക്ക്
അഷ്ടദിക്കുകളില് ഏറ്റവും പ്രധാനപ്പെട്ട ഒരു ദിക്കാണ് വടക്ക്. സോമനാണ് ദിക്ദേവത. കുബേരന്റെ സ്ഥാനമായും കണക്കാക്കപ്പെടുന്നു എന്നതിനാല് സമ്പത്തുമായി ബന്ധപ്പെട്ട ദിക്കുമാണിത്. വാസ്തുപുരുഷ മണ്ഡലത്തില് വടക്ക് ദിശയില് വരുന്ന ദേവന്മാരെല്ലാം തന്നെ സാത്വിക ഗുണവുമായി ബന്ധപ്പെട്ടവരാണ്, അതിനാല് ഐശ്വര്യത്തിനു യോജിച്ച ദിക്കായി ഇതിനെ കണക്കാക്കുന്നു. ഗൃഹങ്ങളില് അളവ് കൊണ്ടോ മര്മ-മധ്യ സൂത്ര വേധം കൊണ്ടോ ഉണ്ടായ ദോഷങ്ങള് വടക്കു ദിക്കിലോട്ടു തീര്ക്കണം എന്നാണ് ശാസ്ത്ര നിര്ദ്ദേശം.
കേരളത്തിലെ കാലാവസ്ഥയില് വടക്കു മുഖമുള്ള ഗൃഹങ്ങള്ക്ക് പ്രാധാന്യം കൂടുതല് നല്കപ്പെട്ടിട്ടുണ്ട്. മനുഷ്യാലയചന്ദ്രിക ഗ്രന്ഥം അഭിപ്രായപ്പെടുന്നത് വടക്കോട്ടുള്ള തെക്കിനി ഗൃഹങ്ങളാണ് ഏകശാല സങ്കല്പ്പത്തില് കൂടുതല് അനുയോജ്യമെന്നാണ്. ഉദയസൂര്യന്റെ അനുകൂല പ്രവാഹം വഹിക്കുന്നതിനായി കൂടുതല് മുറ്റം ഈ ഭാഗത്തു വരുന്നതും ഉചിതമാണ്. വടക്കോട്ടു ചെരിവുള്ള ഭൂമിയും ഉത്തമ ലക്ഷണമായി നിര്ദ്ദേശിച്ചിട്ടുണ്ട്. മുഖ്യന്, ഭല്ലാടന്, സോമന് എന്നീ ദേവന്മാരുടെ പദത്തില് മുഖ്യ ദ്വാരം വരുന്നതും ഉത്തമാനുഭവ പ്രദമാണ്.
ഏതൊരു നിര്മ്മാണവും സുഖവാസ പ്രദമാകുന്നത് ദിക്കുകളുടെ കൃത്യതയും സ്ഥാനങ്ങള്ക്ക് അനുസൃതമായ സന്നിവേശവും മൂലമാണ്. ഇതിനു വിപരീതമെങ്കില് അത് വാസത്തിനു പ്രതികൂലവും വിപരീതാനുഭവപ്രദവുമാകുന്നു. അതിനാല് ദിശാനുബന്ധിയായതും തുല്യമായ മണ്ഡലകൃതിയോടു കൂടിയതുമായ ആവാസ വ്യവസ്ഥിതി പാലിക്കേണ്ടത് വാസ്തുവിദ്യാനുഗുണം യുക്തവുമാകുന്നു.
ഡോ. രാധാകൃഷ്ണന് ശിവന്
പ്രതികരിക്കാൻ ഇവിടെ എഴുതുക: