ഇരിട്ടി: ഉളിക്കല് പുറവയലില് നിര്മ്മാണത്തിലിരുന്ന കിണറ്റില് വീണ് പരിക്കേറ്റ രണ്ട് പേരെ അഗ്നിരക്ഷാസേന രക്ഷിച്ചു. കാലാങ്കി സ്വദേശി പുത്തന് പുരയ്ക്കല് ലാലിച്ചന്, ചെമ്പനാനിക്കല് ബാബു എന്നിവര്ക്കാണ് പരിക്കേറ്റത്. ഇരിട്ടിയില് നിന്നെത്തിയ അസിസ്റ്റന്റ് സ്റ്റേഷന് ഓഫീസര് ടി. മോഹനന്റെ നേതൃത്വത്തിലുള്ള അഗ്നിരക്ഷാ സേന ഇവരെ രക്ഷിച്ച് ഇരിട്ടിയിലെ സ്വകാര്യ ആശുപത്രിയില് പ്രവേശിപ്പിക്കുകയായിരുന്നു.
പുറവയലില് സ്വകാര്യ വ്യക്തിയുടെ കിണറിലെ പാറ പൊട്ടിക്കുന്ന ജോലിയില് ഏര്പ്പെട്ടവരാണ് ഇന്നലെ രാവിലെ ഒന്പത് മണിയോടെ അപകടത്തില് പെട്ടത്. ബാബു കിണറില് നിന്നും കരയിലേക്ക് കയറുന്നതിനിടയില് മണ്ണിടിഞ്ഞതുമൂലം കിണറിലായിരുന്ന ലാലിച്ചന്റെ ദേഹത്തേക്ക് വീഴുകയായിരുന്നു. സമീപവാസികള് വിവരമറിയിച്ചതിനെത്തുടര്ന്ന് എത്തിയ ഇരിട്ടി അഗ്നിരക്ഷാസേന കിണറിലിറങ്ങി ഇവരെ രണ്ടുപേരെയും കയര്കൊട്ട ഉപയോഗിച്ച് പുറത്തെത്തിക്കുകയായിരുന്നു.
അസിസ്റ്റന്റ് ഫയര് സ്റ്റേഷന് ഓഫീസര് ടി. മോഹനന്, അസിസ്റ്റന്റ് സ്റ്റേഷന് ഓഫീസര് വി.വി. ബെന്നി, സീനിയര് ഫയര് ആന്റ് റെസ്ക്യു ഓഫീസര് ബെന്നി ദേവസ്യ, ഫയര് ആന്റ് റെസ്ക്യു ഓഫീസര്മാരായ വി. രാജന്, എം. ജ്യോതിഷ്, സഫീര് പൊയിലന് തുടങ്ങിയവര് രക്ഷാപ്രവര്ത്തനത്തില് പങ്കെടുത്തു.
പ്രതികരിക്കാൻ ഇവിടെ എഴുതുക: